පන්ති පරතරයට නැතිකරලීමට සාමූහික විසදුම් සෙවීමට හොඳම කාලයයි මේ.........

             කම්කරු දිනය යනු කම්කරුවන්ගේ මස්තකප්‍රාප්තීන් සැමරීම සඳහා වන වාර්ෂික නිවාඩු දිනයකි. මීට සතවර්ෂයකට එපිට කාලයක් දක්වා විහිදෙන මැයි දින ඉතිහාසය ලෝකය ට මතක් කර දෙන්නේ වැඩකරන ජනතාව යනුවෙන් පිරිසක්ද සමාජය තුළ වෙසෙන බවයි.මැයි දිනය ආරම්භ වූයේ 1886 වර්ෂයේදී ඇමරිකාවේ හේමාකට් චතුරස‍්‍රයේදීය. ඒ වැඩකරන ජනතාව පැය 8 ක වැඩමුරයක් ඉල්ලාය.

පසුව පැය 8ක සේවා කාලයක් ඉල්ලා අරගල කරමින් එලෙස රුධිරය වැගිරූ තම සගයින් සදාතනිකව සිහිකිරීමට 1889 වසරේ රැස් වූ ජාත්‍යන්තර කම්කරු සංවිධානය තීරණය කළේය. ඒ අනුව සැම වසරකම මැයි 01 වැනිදා ජාත්‍යන්තර කම්කරු දිනය ලෙස ප්‍රකාශයට පත් කරන ලදි.  ලංකාවේ ප්‍රථම වරට කම්කරු දිනය සැමරුවේ 1927 වසරේය. ලංකා ඉතිහාසයේ පළමු මැයි රැළිය 1933 කොළඹ ප්‍රයිස් පිටියෙන් ආරම්භ වී ගාලු මුවදොර පිටියෙන්  අවසන් විය. 1956දී මැයි දිනය මෙරට නිවාඩු දිනයක් ලෙස නම් කරන ලදී.

අද වන විටත් මැයි දිනය ජාත්‍යන්තරය පමණක් නොව ලාංකිකයන් සැමරීම සිරිතක් වශයෙන් සිදුවන්නාවූ සිදුවීමක්  බවට පත්ව ඇත.නමුත් එදා වැඩකරන ජනතාවට සිදුවූ අසාධාරණයන් අභිමුව ඔවුන් වෙනුවෙන් ඔවුන්ම නැගී සිටිමින් කළ අරගලයන් අද වන විට දේශපාලන හෙන්චයියන්ගේ අතකොලුවන් වූ පිරිස් ඇසුරෙන් පොදු පරමාර්ථ පසෙකලා පෞද්ගලික පරමාර්ථ දිනාගනු රිසියෙන් නිරන්තරයෙන් සිදුවේ. අරගලයන් නිරන්තරයෙන් සිදුවුව ද සාමාන්‍ය ජනතාවට ඉන් ලැබෙන සහනයක් නොමැති තරමටම ඒවා ධනය හිමි පන්තියේ උන්නතිය වෙනුවෙන් යොදාගන්නා වූ උපක්‍රමයන් ම පමණක්ව ඇත.නමුත් සිදුවිය යුත්තේ සාමාන්‍ය ජනයාගේ පටන් ධනපතියා දක්වාම සාධාරණීකරණයෙන් යුත් සමාජ ක්‍රමයක් නිර්මාණය වීමයි. එවිට ඇති නැති පරතරය අතර නිරන්තරයෙන් සිදුවන්නා වූ ගැටුම් පමණක් නොව ගැටලු සඳහා ද සාමූහිකත්වයෙන් යුත් සාර්ථක පිළිතුරු ගොඩනගාගැනීමට සමස්ත ලෝකවාසී සෑම ජනතාවකටම හැකියාව ලැබෙනු ඇත.එවිට වැඩකරන ජනතාව වශයෙන් වර්ගවූවන් අතරට නිර්ධනයාගේ පටන් ධනපතියා දක්වාම වූ පිරිස් අයත්වනු ඇත.පන්ති පරතරයක් ද ඇති නොවනු ඇත. සිරිතකට සීමාව පවතින කම්කරු දිනයට ද  සැබෑ අරුතක් එක්වනුද නොඅනුමානය. මැයි දිනයේ දී දේශපාලකයන්ගේ පටු අරමුණ සපථ කර ගැනීමට මැයි රැලි හා ඒක්වනවාද එසේ නැතිනම් පන්ති පරතරයට නැතිකරලීමට සාමූහික විසදුම් ගන්නවාද යන්න සිතන්නට හොඳම කාලයයි මේ....